انا هون انصدمت !! حسيت الدنيا عم بتلف حواللي ومش قادرة اصدق يللي سمعته !!

     

رام الله مكس

بعد ما انهيت مكالمتي مع دانة، تغيرت معالم وجهه ونبرة صوته معي!!!
_هو انت في كل مره بدي احكي فيها مع رفقاتي بدك تعمل نفس القصه !؟؟ ليش ما عم تتقبل فكرة وجود صديقات الي يا عمار !؟
_انت عارفة ليش!! وصرت مليوون مره حاكيلك انه مش حابب صحبتكم ومش مرتاح الها!!
_بس دانه بالذات رفيقة عمري، صارللي بعرفها ثلاثين سنه والبنت محترمه ومثقفه ومسلية جداً.
_مش شايفة لبسها وحركاتها وتحررها الزايد عن حده !؟؟
_ونحن شو دخلنا فيها وفي لبسها !!
_اسمعي علي، البنت شمال ومش محترمة ابداً، خلص نحن الشباب النا نظره خاصه وبنعرف نميز اخلاق البنت من مشيتها .
_ليش انت لهالدرجة متبع عالبنت وتصرفاتها لقدرت تحكم عليها هيك !؟؟
_انا قلت اللي عندي، مرة ثانية ما بدي اشوفك معها، واذا عرفت يا رنا انك بتشوفيها او بتلتقي فيها من ورا ظهري ليصير شي ما يعجبك ابداً.
.
.
.
_عنجد اشتقتلك كتير يا دانة، بس عارفة عمار ومخه كيف عامل !!
_هههه حبيبتي الله يكون بعونك، مش عارفه كيف بتتحملي هالشي عنجد!!!
ييييي عليناااا !!
_خير شو مالك !!
_يا بنت الحلال هذا الرقم جنني، كل يوم برنللي شي ألف مرة غير الرسائل وكلام الحب !! عفكرة شكلو بعرفني منيح وانا ولاااا قادرة اعرفه !!
_والله انا بعذره بصراحة، هو في حد ممكن يشوفك وما يعشقك ،ان شاء الله بنفرح فيكي عن قريب وبتخلصي من قصص الغرام هي.
_اففففف شوفي،شوفي… رجع يرنللي من جديد،والمشكلة انه عامل رقمه برايفت هالجبان، لا قادرة اشكي عليه ولا قادرة اعمله حظر.
_هاتي هاتي….سمعيني بالله شو بده يحكي!! خلينا نضحك شوي !
_آلو…. كيفك يا دانه !!! واخيرا رديتي عمكالماتي ؟؟



انا هون انصدمت !! حسيت الدنيا عم بتلف حواللي ومش قادرة اصدق يللي سمعته !! للحظة كنت بدي اكذب مسامعي وانكر يللي عم بصير !!
عمار !!!! زوجي ؟؟؟ يللي مش مستعد يرنللي الا وقت ما يجوع ويسأل عن طبخة اليوم !! يللي صارله سنين بحاول يبعدني عن رفيقتي لحتى يخلو اله الجو ويتقرب منها ؟؟ يللي ما كان يحلاله ياخد مغادرة من شغله الا وقت ما يعرف انه دانة عندي بالبيت !! عماااار يللي بعمره ما غازلني بكلمه حلوة عم يقضي ليله ونهاره غزل واشعار مع رفيقتي !!!
_رنا!! رنا ؟؟ شو مالك حبيبتي !
_آلوووو…. آلووووو!!!! رنا عندك !؟؟؟؟ ردي !!
_وانت شو عرفك في رنا ؟؟ ميين انت !!!
.
.
.
_بتكسري كلمتي وبتطلعي عن شوري اه !!!
_هلا عرفت ليش كنت ضد علاقتي فيها! عشان تاخد راحتك وما اكون عائق امامك صح ؟؟
_عفكرة عملت هيك لاني كنت بدي اكشفك واشوف اذا بتردي علي او لا !! بس طلع كلامي ما اله قيمة !!
_اااااخ بس، صدق يللي قال “ضربني وبكى،سبقني واشتكى”

#ياسمين_الخطاب

 

اترك تعليقاً

لن يتم نشر عنوان بريدك الإلكتروني.

This site uses Akismet to reduce spam. Learn how your comment data is processed.