رام الله مكس
كنت كل ما اشوف بنت خطبت من شب ما بتحبه ينقبض.قلبي…. انا بحب علي من 3 سنين، وكل ما يتقدملي حدا كنت ارفض مشانه! بس هو لليوم مو قادر يخطبني، كانوا عندي شلة صاحبات ، كل ما يشوفوني يضحكوا ويحكولي ولك اتركيكي منه، بكرا بصير عمرك 26 وبتعنسي، وامه بتشوفله وحدة صغيرة ! انا جد انقهر واتضايق، واتصل علي واعمل معه مشكلة واصير احكيله يلا متى رح تخطبني … كان يحكيلي: اصبري رح تكوني مرتي والله غيري ما رح ياخدك … علي بس انا تعبت! صرلنا 3 سنين وصرت رح ادخل بال26 وبتعرف كيف الكل بطلع عالبنت الي مو متزوجة بهالعمر ، رح اكبر واهلك يبطلوا يقبلوا فيي … يضحك ويحكيلي رح تضلي طفلتي .. وجد صار عمرك 26 ! انا كنت أحبه كتير وانا عارفة انه كان يحبني، كثير مواقف بشعة تخطيناها مع بعض، كانت علاقتنا كلها مبنية عالاحترام والثقة ….
بيوم من الأيام تقدملي شب وضعه كتير منيح، كان قادر يفتح بيت ، اهلي صاروا يقنعوني، واجت صاحبتي لعندي عشان تقنعني اوافق .. قلتلها انا بحبه! حكتلي الحب ما بطعمي خبز وقلتلها وكيف رح تكون حياتي مع حدا ما بعرف شي عنه؟ صارت تحكي اخرتك بتعرفي؛ يعني حبيبك شو بختلف عن هالشب …
صفنت ودمعت قلتلها بتعرفي، بختلف انه هو معي من 3 سنين، لما ازعل بعرف شو الي زعلني، لما اكون متضايقة واضحك ، بعرف انه هالموقف مضايقني، بعرف كل تفاصيل نفسيتي، وتقلباتها ؛ بعرف ليش انا بكره الذرة مع انها زاكية، ما في داعي اقعد احكيله ساعة انه الكرشات اكلتي المفضلة ، بس ما باكلها عشان مرة من انا وصغيرة شفت امي بتعملهم، بعدها بطلت اكلهم ورجعت اكلتهم ، ما بحتاج لشرح ساعات لحتى يفهمني ويفهم شو فيي … وعارفة شو كمان، انا بفهمه، بعرف انه هالشي رح يعصبه، بعرف اكتر اكلة بحبها، كيف علاقته بالناس الي حوالي، وبعرف انه هو وابو دائما متمشكلين مع هيك اكتر حدا حنون عأهله .صاحبتي حكتتت يووووو خليكي غاطسة بهالاحلام الوردية بكرا بس يتركك، او تتزوجي حتى بتصحصحي!
وطلعت …
بعد شهر ونص، انا داخلة اقدم القهوة، اجت عيني بعينه، ابتسمتله وابتسملي، نزلت دمعة من عيوني وتذكرت حبيبي ، اهلي واهله اتفقوا ، كتب الكتاب بالتاريخ الفلاني، كتبنا الكتاب، كان في شغلات لسا بنكتشفها ببعض، وبليلة العرس كنت حاسة اني اسعد وحدة بالدنيا، كنت مبسوطة وبدي اطير من فرحتي، لانه رغم كل شي ، صبرت ونلت واخدت حبيبي 
? اه تزوجت انا وعلي، كنا خايفين يكون زواج فاشل لانه اساسه الحب، كنا خايفين من كتير شغلات، بس كل هالشغلات تجاوزناها، صحيح كنا نختلف على كم شغلة، بس بكفي انه ما بخليني ازعل اكتر من 10 دقايق، وبيجي عندي بحكيلي بحبك ووقتها انا بنسى كل شي! لانه عارفه انه حبنا كان كله بالحلال ، ما عمرو تجاوز حدوده معي، كان دائما يخاف علي، صحيح في ناس حكولي الحب حرام، بس هاي مشاعر مش بايدنا 
❤ ونيال كل وحدة حبيبها زلمة.. ومش شرط انه الزواج التقلييدي فاشل احلى شي بهالزواج انه احنا فاهمين بعض، بنضحي مشان بعض، وعارفين انه هو اختيارنا ومش نصيبنا، خلينا نشوف الحب من زاوية المنيحة، الحب حلو بس الناس الي شوهت مفهومه* مش شرط الزواج عن حب يكون فاشل ، يمكن هو قمة السعادة والنجاح بكفي النظرة الاولى الي بطلعها عليكي عن مية كلمة وكلمة
هاي انا حبيتك ووفيت بوعدي … هيك صرتي حلالي ❤
بقلم : هديل قاسم
